ताथलीमा पहिरो जाँदा पक्की घर र गोठमा क्षति

भक्तपुर, भदौ ५ । चाँगुनारायण नगरपालिका वडा नं -९ ताथलीको गोठाले चौरमा केही दिनदेखि परिरहेको अविरल बर्षा र झरिको कारणले स्थानीय बिकास खड्का र गणेश वहादुर खड्काको घर माथिबाट आएको पहिरोबाट बिकास खड्काको गाई गोठ पूर्ण क्षति भएको चाँगुनारायण नगरपालिका वडा नं -९ का वडा अध्यक्ष गणेश त्यातले बताउनुभएको छ ।
गणेश बहादुर खडकाको गोठ पुर्ण क्षति भई गोठमा पुरेको ३वटा बाख्रा मध्ये १ वटा बाख्रा स्थानीयहरुको सक्रियतामा जीउदै उद्वार गरिएको छ ।
पहिरोले तीन तल्ले पक्की घरको भूई तल्लाको झ्यालको चौकोस समेत भत्की भित्र पहिरो छिरेको छ । पहिरोबाट थप क्षति हुन नदिन पहिरो संगै आएको रूखलाई ब्यवस्थापन गर्न नगर प्रहरीहरू,जनप्रतिनिधिहरु, नेपाल प्रहरी, नेपाली सेना , स्थानिय बासिन्दाहरू , डोजर धनी,डोजर अपरेटर लागि परेको बताइएको छ ।
वडा अध्यक्ष त्यातले जोखिम कायम रहेको हुँदा आ आफ्नो क्षेत्रबाट जोखिम न्यूनीकरण गर्न साथ र सहयोगको अपेक्षा समेत गर्नुभएको छ ।