भक्तपुर, २४ जेठ । भक्तपुर नगरपालिका १० नं वडा कार्यालयको आयोजनामा नाक, कान र घाँटी स्वास्थ्य शिविर तथा खोप सुनिश्चितता घोषणा कार्यक्रम उपप्रमुख रजनी जोशीको प्रमुख आतिथ्यतामा बेखाल जन स्वास्थ्य चौकिमा शनिवार एक समारोहबीच सम्पन्न भयो ।
उपप्रमुख रजनी जोशीले नगरबासीको स्वास्थ्य राम्रो भए देश र समाज राम्रो हुने बताउँदै शिक्षा र स्वास्थ्यमा भक्तपुर नगरपालिकाले प्राथमिकता दिएको बताउनुभयो । उहाँले नसर्ने रोगले विकराल रुप लिइरहेको अवस्थामा स्वास्थ्य परिक्षण विना जथभावी खानपानले ठूल्ठूला रोगहरु निम्ति रहेकोले जनताको हितमा स्वास्थ्य शिविरहरु राख्दै आएको बताउनुभयो । उहाँले आर्थिक बर्षको अन्त्यमा बजेटको सिजनमा योजना छनौट र सुझाब संकलन कार्य समेत भई रहेको बताउनुभयो । उहाँले समाजवादी व्यवस्था भनेको जनताको सेवा र तल्लो बर्गको पँहुच बनाउने बताउँदै जन्मदेखि मृत्युसम्म पनि जनताको आधारभूत आवश्यकता राज्यले दायित्व बहन गर्ने व्यवस्था समेत रहेकोले शिशुस्याहारदेखि कलेजसम्म संचालन गरी शिक्षाको गन्तव्य बनाउँदै लगेको बताउनुभयो ।
कार्यक्रमका सभापति १० नं वडाध्यक्ष लक्ष्मी प्रसाद ह्यौमिखाले दुई बर्ष मुनिका बालबालिका खोप सुनिश्चितता घोषणा गर्दै आफ्नो स्वास्थ्य आफैले हेरचाह गर्नुपर्ने बताउँदै स्वस्थ्य शरीरले मात्र काम गर्ने सक्ने बताउनुभयो । उहाँले खानेपानी समस्या, नगरकोट सडक खण्ड मर्मत गर्नुपर्ने बारे, रगत निःशुल्क वितरण, अक्सिजन निःशुल्क वितरण बारे बताउनुभयो ।
कार्यक्रममा वडा सदस्य कृष्ण नारायण डुमरु, महिला वडासदस्य तारादेबी शाक्य, वडासदस्य जितेन्द्र मुनंकर्मी र वडा सचिव रामेश्वर कोजूले पनि बोल्नुभएको थियो। उक्त कार्यक्रममा १२० जनाले नाक, कान र घाँटीको परिक्षण गरी लाभ लिएको वडानिरिक्षक रामकृष्ण प्रजापतिले बताउनुभयो ।
