भक्तपुर, जेठ १९
नेपाल रिपब्लिक मिडियाको आयोजनामा ‘म नागरिक म बनाउँछु नेपाल’ कार्यक्रम सोमबार भक्तपुरको दरबार क्षेत्रमा सम्पन्न भयो । कार्यक्रमको उद्घाटन गणतन्त्र नेपालका पहिलो राष्ट्रपति डा. रामवरण यादवले गर्नुभयो ।
कार्यक्रमको उद्घाटन गर्दै पूर्वराष्ट्रपति यादवले नेपालमा संघीय लोकतान्त्रिक गणतन्त्र स्थापनालाई जनतालाई स्वतन्त्र नागरिक बनाइदिएको दिनको रुपमा स्मरण गर्दै गणतन्त्रवादीहरु आम जनताको हितमा अझ दत्तचित्त भएर लाग्नुपर्ने बताउनुभयो ।
चुरे पहाड दोहनले नेपालको तराई मरुभूमिमा परिणत भएको बताउँदै उहाँले यसलाई समयमै रोक्न सकिएन भने चुरे क्षेत्र थप कमजोर बन्न गई तराई मधेसको जनजीवन अझै संकटग्रस्त हुने बताउनुभयो ।
युवाहरुको विचार र सिर्जनशीलतालाई सम्मान गर्न आयोजित नेपाल रिपब्लिक मिडियाको आयोजनामा भएको ‘म नागरिक म बनाउँछु नेपाल’ कार्यक्रमले देशका युवाहरुलाई आफ्नै देशमा केही गर्छु भन्ने सन्देश दिने विश्वास व्यक्त गर्नुभयो ।
कार्यक्रमका विशेष अतिथि भक्तपुर नगरपालिकाका प्रमुख सुनिल प्रजापतिले ‘म नागरिक म बनाउँछु नेपाल’ शीर्षकमा छोटो भिडियो निर्माण गरेर देश र समाजलाई सकारात्मक सन्देश दिने कोसिस भएको बताउँदै नेपाल विदेशीहरु आएको बनाउने नभई हामी नेपालीहरुले नै बनाउने हो भन्नुभयो ।
आर्थिक रुपमा स्वतन्त्र नभएको देश राजनीतिक रुपमा स्वतन्त्र नहुने बताउँदै प्रमुख प्रजापतिले युवाहरुसँग भएका ज्ञान, सीप र विशेषज्ञता देश र समाजको लागि प्रयोग गर्न प्रेरित गर्नुभयो ।
हरेक नागरिकले आफ्नो ठाउँ आफै बनाउने प्रण गरे देश छिटै विकास हुने धारणा राख्दै प्रमुख प्रजापतिले उपत्यकाका सांस्कृतिक एवम् ऐतिहासिक सम्पदा संरक्षणमा संघ, प्रदेश र स्थानीय सरकारको संयुक्त प्रयासले मात्र सम्भव हुने बताउनुभयो ।
कार्यक्रममा नेपाल रिपब्लिक मिडियाका निर्देशक समृद्धि ज्ञवालीले कार्यक्रमको उद्देश्यमाथि प्रष्ट पार्नुभएको थियो भने नागरिक पत्रिकाका प्रधानसम्पादक गुणराज लुइँटेलले यो कार्यक्रमको महत्वबारे प्रष्ट पार्दै कार्यक्रमले युवाहरुमा उत्साह थपेको र समाजमा यसले सकारात्मक सन्देश प्रवाह गर्नेमा विश्वस्त रहेको बताउनुभयो ।
‘म नागरिक म बनाउँछु नेपाल’ अन्तर्गत सन्देशमूलक छोटो भिडियो निर्माण गर्नेमध्ये प्रथम, द्धितीय र तृतीय हुनेलाई डा. रामवरण यादवले नगदसहितको पुरस्कार प्रदान गर्नुभएको थियो ।
